काबिल सम्बाददाता
पर्सा, ३१ जेठ
मकवानपुरको रातमाटेमा आधा करोड बढिको सुन सहित पर्साका एक युवकलाई मकवानपुर प्रहरीले पक्राउ गरेको छ । जिल्ला प्रहरी कार्यालय मकवानपुरबाट खटिएको प्रहरी टोलीले रातोमाटे चेकपोष्टमा चेकजाँच गर्ने क्रममा रु ५४ लाख ४८ हजार बराबरको अवैध सुन सहित पर्साका ती युवकलाई पक्राउ गरेको हो ।
पक्राउ पर्ने युवक पर्साको वीरगन्ज महानगरपालिका वडा नम्बर १६ का २२ बर्षीय किसन साह रहेको मकवानपुर प्रहरीले जनाएको छ । प्रदेश २–०३–००१ ख ०१५९ नं को बसमा चेकजाँच गर्दा उक्त सुन सहित युवकलाई पक्राउ गरिएको मकवानपुरका प्रहरी उपरिक्षक बामदेव गौतमले बताए । सो सुनको बजार मूल्य करिब रु ५४ लाख ४८ हजार बराबरको रहेको उनको भनाइ छ । अभियुक्त साहले जुत्ताको नोक भित्र सुन लुकाएर ल्याएको फेला परेपछि अवैध सुन सहित अभियुक्त साहलाई पक्राउ गरिएको हो । उनले लुकाइछिपाई अवैध तरिकाले ल्याएको सुनको तौल परिक्षण गर्दा ५ सय ६१ दशमलव ३० ग्राम रहेको प्रहरी उपरिक्षक गौतमले बताए ।
