काबिल सम्वाददाता
वीरगन्ज
वीरगन्जमा रहेको मुलुकको पहिलो सुख्खा बन्दरगाह भन्सार कार्यालय (ड्राइपोर्ट) ले अघिल्लो वर्षको तुलनामा ११ दशमलब ५७ प्रतिशत बढि राजश्व संकलन गरेको छ । नेपाली व्यवसायीले पैठारी गरेका सामान सुख्खा बन्दरगाह भन्सारसम्म मालवाहक रेलबाट सिधै आउँछ । मालबस्तु बोकेर रेल नै नेपाली भूमिमा आउने यो नै पहिलो बन्दरगाह पनि हो । अनि यताबाट पनि विभिन्न सामान छिमेकी या तेस्रो मुलुक पठाउँदा त्यहाँ जाँचपास हुन्छ । सो सामानहरुको भन्सार जाँचपास गराउँदा संकलित राजश्व अघिल्लो आर्थिक वर्षमाभन्दा गएको आर्थिक बर्ष २०८०÷०८१ मा ११ दशमलब ५७ प्रतिशतले बढेको पाइएको हो ।
यो भनेको सुख्खा बन्दरगाहले अघिल्लो आर्थिक वर्ष २०७९÷०८० मा भन्दा गएको आर्थिक वर्ष (०८०÷०८१) मा ४ अर्ब ९० करोड ७८ लाख ९७ हजारले बढि राजश्व संकलन गरेको तथ्याँकले पुष्टि गरेको छ । सुख्खा बन्दरगाह भन्सार कार्यालय वीरगन्जले अघिल्लो आर्थिक वर्ष कुल ४२ अर्ब ४० करोड २२ लाख ९३ हजार मात्र राजश्व संकलन गरेको थियो । तर गएको वर्ष भने ४७ अर्ब ३१ करोड ०१ लाख ९० हजार राजश्व संकलन गरेको सुख्खा बन्दरगाह भन्सार कार्यालय वीरगन्जका प्रमुख धन बहादुर बरुवालले बताए । तथापि राजश्व संकलनको लक्ष्यमा भने अझै कमै रहेको उनको भनाइ छ ।
विभागले वीरगन्जमा अवस्थित मुलुककै पहिलो सुख्खा बन्दरगाह भन्सार कार्यालयलाई कुल राजश्व संकलनका लागि ६५ अर्ब ९४ करोड ०१ लख २२ हजारको लक्ष्य दिएको थियो । यो राजश्व संकलनका लागि बढि योगदान गर्ने सामान अझै अपेक्षाकृत रुपमा नभित्रिदा लक्ष्य चाही केही भेटाउन नसकिएको उनको भनाइ छ । राजश्वमा बढि योगदान गर्ने फलामजन्य बस्तु र तयारी अवस्थाको विदेशी मदिरा लगायतको आयातमा केही कमी हुँदा राजश्वमा स्वभाविक प्रभाव परेको उनको तर्क छ ।
खास गरी कुल पैठारीमा नै केही गिरावट आउँदा राजश्व लक्ष्यमा भंसार चुकेको सुख्खा बन्दरगाह भन्सार कार्यालयका सूचना अधिकारी तथा भन्सार अधिकृत सुशिल शर्माले बताए । अघिल्लो आ.ब.मा यो भन्सार कार्यालय हुँदै कुल ३११ अर्ब मूल्य बराबरको मालबस्तु पैठारी भएको थियो । तर गत आ.ब.मा भने सो परिणाममा पनि केही कमी हुँदै कुल ३०२ अर्बको मात्र मालबस्तु पैठारी हुँदा स्वभाविक रुपमा राजश्वमा थोरै अवसर देखिएको उनको भनाइ छ । टप २० आइटम मध्ये स्पन्ज आइरनमा १ अर्ब, विलेट पलाममा पनि १ अर्ब १४ करोड जति राजश्व कम उठेको छ । त्यसै गरी तयारी अवस्थाको विदेशी मदिराबाट पनि १२ करोड जतिको राजश्व गिरावट भएको सूचना अधिकारी शर्माको तर्क छ । मुलुकको लागि पैठारीको लागत घट्नु हितकर भए पनि पैठारीमा आउने गिरावटले राजश्व संकलनको लक्ष्यमा भने कमी आएको उनको भनाइ छ ।
