नीजि विद्यालयहरुको संगठन ‘प्याव्सन’ पर्साले आयोजना गरेको ‘जुनियर फुटवल प्रतियोगिता २०८०’ को उपाधी साउथ जोन मा.वि.ले चुमेको छ । पर्साका विभिन्न २५ वटा नीजि विद्यालयहरु सहभागी जुनियर नकआउट फुटवल प्रतियोगिता २०८० को उपाधी यो वर्ष साउथ जोन मा.वि.ले चुमेको हो ।

गतवर्षको विजेता लिटल फ्लावर एकाडेमी यो वर्ष रक्षात्मक भयो । उसले यो वर्ष उपाधी रक्षा गर्न सकेन । फाइनल खेलसम्म पुगेको उसले खेलमा राम्रो प्रदर्शन गरे पनि जितका लागि त्यो पर्याप्त नभई उपविजेतामा चित्त बुझाउन प¥यो । लिटल फ्लावरको गोलपोष्टमा साउथ जोन मा.वि.का खेलाडीले २ गोल गरे । तर लिटल फ्लावरले भने साउथ जोनको जालीमा १ गोल मात्र चुमाउन सक्यो । फलतः उसले उपविजेतामा नै चित्त बुझाउन परेको छ ।

गएको माघ ७ गतेबाट सुरु भएको प्याव्सन पर्साको ‘जुनियर फुटवल प्रतियोगिता २०८०’ को तेस्रो स्थान भने मनकामना मा.वि.ले प्राप्त गरेको छ । बुधबार एकै दिन विजेता उपविजेता र तेस्रो स्थानका लागि भएका दुई वटा प्रतियोगितामा सफल एकेडमीलाई ० का विरुद्ध १ गोल गरी मनकामना मा.वि.ले तेस्रो स्थान सुरक्षित गरेको छ । मनकामना मा.वि.का खेलाडी र सफल एकेडमीका खेलाडीका बीच भएको रोमाञ्चक खेलमा हाफटाइम पछिको ३ मिनट समय बाँकी हुँदा मनकामनाका जर्सी नम्बर १० का प्रिन्स मगरले उत्कृष्ट गोल गरी टिमलाई तेस्रो स्थानमा सुरक्षित राखे ।

खेल अवधिभरको उत्कृष्ठ गोल किपरको ट्रफी भने सफल एकेडमीका गोलकिपरले हात पारेका छन् । त्यसैगरी सबै प्रतियोगितामा सबैभन्दा बढि गोल गर्ने खेलाडी साउथ जोन मा.वि.को जर्सी नम्बर ७ का ऋतिक चौधरी भए । उनलाई प्रेस चौतारी नेपाल पर्साका अध्यक्ष तुलसी भण्डारीले ट्रफी र प्रमाणपत्र प्रदान गरे । त्यसै गरी वेष्ट मिड फिल्डर लिटर फ्लावरका सन्तोष घले घोषित भए । उनलाई प्रेस सेन्टरका केन्द्रिय सदस्य कृष्णउदास खनालले ट्रफी र प्रमाण पत्र प्रदान गरी सम्मान गरे ।

प्रथम, दोस्रो र तेस्रो स्थान प्राप्त गर्ने विद्यालयका विजयी खेलाडीलाई वीरगन्ज महानगरपालिकाका शैक्षिक प्रशासन महाशाखा प्रमुख अरविन्द लाल कर्ण, प्याव्सनका केन्द्रिय सदस्य छेडुप लामा र प्याव्सनका जिल्ला तथा महानगर अध्यक्ष पुरन प्रधान, आलोक चौरसिया र प्रेस सेन्टरका केन्द्रिय सदस्य निरज पिठाकोटे मगर, एन प्याव्सनका पर्सा अध्यक्ष रामराज श्रेष्ठ लगायतले ट्रफी, पदक र प्रमाण पत्रले सम्मान गरे ।

जुनियर नकआउट प्रतियोगिताका लागि ४ फिट १० इन्चसम्म उचाई भएका खेलाडीलाई मात्र छनौट गरिएको प्याव्सन पर्साका उपाध्यक्ष तथा फुटवल प्रतियोगिताका संयोजक शिवजी गुप्ताले बताए । जुनियर नकआउट प्रतियोगिता भएको कारण उमेरभन्दा पनि उचाइलाई बढि प्राथमिकता दिएको उनको भनाइ छ ।

पढाईसँगै अतिरिक्त क्रियाकलाप अन्तरगत खेलकुदबाट राष्ट्रिय तथा अन्तर्राष्ट्रियस्तरका खेलाडी उत्पादन गर्ने लक्ष्य सहित प्याव्सन पर्साले हरेक वर्ष फुटवल र क्रिकेट प्रतियोगिता गर्दै आएको प्याव्सन पर्साका अध्यक्ष पुरन प्रधानले बताए । २०७१  सालदेखि खेलकुदलाई प्राथमिकता दिर्दै सुरु गरिएको फुटवल र क्रिकेट प्रतियोगिताको यो संकरण आठौं भएको उनको भनाइ छ । कोरोना महामारीको समयमा दुईवर्ष भने यो प्रतियोगिता पनि प्रभावित भएको उनको भनाइ छ । फुटवल प्रतियोगिता विपत् व्यवस्थापन प्रहरी कार्यालय वीरगन्जको खेल मैदानमा सम्पन्न भएको छ । क्रिकेट प्रतियोगिता भने वीरगन्जको आदर्शनगर रंगशालामा संचालन भइरहेको प्याव्सन पर्साले जनाएको छ । यसको फाइनल खेल भने आगामी शुक्रबार हुने पनि प्याव्सन महानगर प्रमुख आलोक चौरसियाले बताए ।

प्रतिक्रिया लेख्नुहोस्